علمتني

السلام عليكم

محاولة خجلة .. عسى أن تنال ولو على القليل من إستحسانكم




......
.......


أقول ياللي الغـدْر زاده وشربـه
ماتبطنه يظهر ولو تلبـس قنـاع
ابعد ووفَّـر كـل عـذر ٍ وطلبـه
قد قيل في الامثال من باع ينبـاع
اليا هنـا وكـل ٍ يـروَّح فدربـه
رميت أنا حبك من القلـب للقـاع
وطيتـه برجلـي جزيتـه بذنبـه
ماترفعه آسف ولا زايف أطبـاع
فصفحة طموحي مالك اليوم حِسبه
فرقاك هي راي المشاعر بإجمـاع
بالأمس تدفعنـي للامـاك رغبـه
ومشاعري لوْفاك كم كانت جيـاع
وقت ٍ مضى حبّي عنى لك بسربه
جالك على صوتك ملبّـي وفـزّاع
غرّيتني بليَّـن كلامـك وعذبـه
كنت احْسبك صادق واثاريك خدّاع
خنت العهد لاتقول ذا القول كذبـه
شفت بعيوني كل ماكـان ينـذاع
غدرتنـي غـدر ٍ بلانـي بكُربـه
غدر ٍ فحرّه وافر الود لـك مـاع
غدر ٍ ترك خنجرْه في القلب ندبه
ذكرى لعار ٍ شلته بوسط الاضلاع
واحلف برب ٍ عز في الأرض كعبة
لَمْحيه من قلبي ولا اجيب لك داع
لذا ابتعد سق حمل عذرك ورِكبـه
ودوَّر وتلقى من فشرواك طمّـاع
أمّا أنـا لاشـك تكفينـي ضربـه
وماراح تثنيها وتحلَـم بمرجـاع
علّمتني إنك الـى الدنيـا أشبـه
وعلّمتك اني لَرْذل الطبع مَنصـاع
وعلّمتك إن الحب ماهـوب لعبـه
فرح ابتعد حتى بـلا كلمـة وْداع
رح ابتعد فرقاك ماهيـب صعبـه
خلاص مالك داخل القلب مربـاع